السودان: بابكر سلك يكتب: هل استفدنا من التجربة ياناس؟




] العمل الإيجابي مهما كانت نتائجة سالبة إلا أنه يعتبر عملاً مفيداً ونافعاً.
] لأن النتيجة السالبة أتت معها خبرة مفيدة .
] ولاتكون النتيجة السالبة مفيدة إلا إذا استفاد الناس من التجربة.
] فهل في ثورتنا دي استفدنا من ثورتنا ديييك؟.
] هل استفدنا من الإفرازات السالبة التي أدت لوأد وسرقة ثورة مارس أبريل رجب؟.
] فهل استفدنا نحن من مخرجات ثورتنا في خمسة وتمنين وضمنا عدم سرقتها؟.
] وهل نحن سعداء بما شاهدناه في ثورة مصر وكشفنا سر الأزمات؟.
] الإجابة عند الشارع وفهم رجل الشارع.
] سنعرفها في الأيام القادمات.
] قبل الإجابة على هذا السؤال .
] قالوا السعيد بشوف في غيرو.
] فهل نحن سعداء بما شفناهو في مصر؟.
] مصر ثارت ونجحت وأتعملت فيها إنتخابات.
] وفاز مرسي.
] وقبل وبعد كل ذلك عاشت أزمات مفتعلة وضاق الناس وأجج الإعلام الضيق.
] وتدخل من تدخل فترجل العدل وتم وأد الثورة المصرية.
] حدث ماحدس.
] وسرعان ما أنفرجت الأزمات وتوالت دعومات دول المحور.
] وتم نقل الثورة للإنعاش لأن الثورات لاتموت.
] الجفلن أنقرعن ورجعن .
] والخوف من الواقفات.
] كان جفلن مافي زول بقرعن.
] بالذات بعد همهمات الاستنكار والإنكار لحزومي.
] زول كان حبيب الشعب.
] فجأة.
] حدث ماحدس.
] ياربي الحاصل شنو؟.
] المهم.
] قالوا إجراءات قيد محترفي المريخ الجدد تجري سراً.
] عقد سري.
] ياربي تسجيلات مسيار ولا الحاصل شنو؟.
] زمااان قلنا ليكم .
] الحركات البتطول عمرو خلوها وأتبعوا القانون.
] ياحليل عبدالرحيم محمد حسين.
] كان ودانا في داهية بقرار يخرجنا فيهو من عائلة الفيفا ويدخلنا بيهو في المايقوما.
] المهم .
] قالوا مشاركة الهلال في دورة تنزانيا جاءت إنزالاً للمثل كتلوك ولا جوك جوك.
] بالذات ومازيمبي مشارك.
] لكن بيني وبينكم .
] أخير الهلال.
] لقى ليهو دورة إتلمة عليها.
] نحنا دورة تدريبية ماعندنا.
] غايتو .
] السكري مابخلينا.
] بس نحافظ عليهو.
] ما يعلى يودينا.
] أو ينخفض يدودر بينا.
] أيها الناس.
] إن تنصروا الله ينصركم.
] أها.
] نجي لي شمارات والي الخرتوم.
] كان شفت يا والينا.
] ست الودع رمت لينا.
] قلنا نشوف الحاصل علينا.
] وكشكشت ورمت.
] ختت أصبعها في ودعة وأتمحنت وسألت.
] بت الصرة الطغيااانة وماسمحة شينة وغبشة ويابسة ومعصعصة و بعد ده بتعاين ليكم بقعر عينها دي مني؟.
] دي الرغيفة ياحاجة.
] لي كشكشي.
] وكشكشت ورمت.
] عاينت للودع مسااافة وقالت .
] بنات الصرة متابعات ومتلملمات يجرن كدي ويقبلن يجرن كدي مقومات نفسن ومقومات الغبار فوق كم؟.
] والله ياحاجة التاتشرات ديل حيرننا.
] مدورات مقومات الغبار.
] مبطلات مقومات نفسنا.
] ولي كشكشي.
] وكشكشت ورمت.
] عدلت توبها.
] وشختت في الواطة .
] هوشة حريم ونعمة كريم..كدي جد لي….منن ديل.
] ديل الكنداكات…. لكن متلملمات مالن ياحاجة؟.
] ورمت الودع وقالت
] كان ما أخاف من الكضب ماشات على الفيلم المصري.
سلك كهربا
ننساك كيف والكلب قال أبو الهول ذاتو لو جا البلد دي نأكلوا جممم.
وإلى لقاء.
سلك

اضغط هنا للانضمام لمجموعات الانتباهة على تطبيق واتساب






مصدر الخبر موقع الانتباهه

اترك تعليق

%d مدونون معجبون بهذه: