📌 دبابيس من صحف الثلاثاء 18 مايو 2021م – صحيفة الوطن الإلكترونية



📌 دبابيس من صحف الثلاثاء 18 مايو 2021م
ه
ه
واحدين ناس وواحدين دباس:
👈 ان الاهتمام والتقدير والتكريم الذي حظي به الثوار والثورة السودانية في مؤتمر باريس يوضح تماما الفرق بين الناس والدباس…. (والدباس للناطقين بغيرها نوع من أنواع الطيور)….
ه
ه
حكمة اليوم:
👈 انكشح الحبر واتشتت الرصاص…..
ه
ه
بين الأمس واليوم:
👈 مايو 2010 فرنسا ترفض دعوة رئيس السودان إلى قمة فرنسا – إفريقيا…….
👈 مايو 2021 فرنسا تحتضن مؤتمر دولي لإعفاء ديون السودان……
📌 عهد فسادو واستبدادو الله لا عادو….
ه
ه
لا نريد منح ، نريد استثمارات:
👈 ‏ الخُرطوم: باج نيوز…. قال رئيس الوزراء عبد الله حمدوك إنّ السودان يأتي بالأمل، لنجاحنا تأثير كبير في المنطقة بأكملها ، السودان بلد غني جداً ، لا نريد منح ، نريد استثمارات.
و أضاف خلال كلمته في مؤتمر باريس لدعم الانتقال في السودان: نحن بحاجة إلى وقف النموذج الذيّ ورثناه من الاستعمار القائم على المواد الخام، و العمل على إضافة قيمة لصادراتنا لأجل توفير وظائف بالقطاع الصناعي لشبابنا، فبدلاً من قيامهم بهذه الرحلة الخطيرة عبر البحر الأبيض المتوسط ، يبقون معنا و يطورون البلد معنا……
📌 هنا يكمن الفرق بين القائد والشاحد ، بين الفاهم والخادم ، بين الكوز ومن ينشد الفوز…..
ه
ه
📰 الوطن:
👈 أكثر من “4” مليار دولار منح وقروض للسودان في مؤتمر باريس.
📌 ويجيك عاطل يقول لك اداني ليها محمد بن سلمان وقال لي ما تحدث زول
ه
📰 الوطن:
👈 في طائرة بدر مجدداً.. ضبط “15” كيلو ذهب مهرب.
📌 بدر كان تتوب الموية تبقى روب
ه
📰 الوطن:
👈 البرهان : نمر بمنعطف تاريخي والجيش ضامن للتحول الديمقراطي.
📌 وان شاء الله نكتل ملف قبل المنعطف دا ونعبر رغم حقد الحاقدين
ه
📰 الوطن:
👈 السعودية تعلن إعفاء ديونها على السودان.
📌 عفى الله عنهم
📰 الصيحة:
👈 مجلس الأمن والدفاع برئاسة حميدتي يمدد تفويض بعثة اليونيتامس
📌 حميدتي جاي مجهز قلمه ما عنده أي لولوة
ه
📰 الصيحة:
👈 البرهان يستبعد ترشحه للرئاسة في الإنتخابات
📌 ما بدري يا خليفة
ه
📰 الصيحة:
👈 ماكرون/ نؤيد الحكومة الانتقالية وصولا إلى إنتخابات حرة
📌 شاء من شاء وأبلا من أبى
ه
📰 الصيحة:
👈 إزالة التمكين بالجزيرة توصي باسترداد 50 ألف قطعة أرض
📌 50 ألف قطعة دي محلية عدييييل
ه
📰 الصيحة:
👈 حمدوك في مؤتمر باريس/ لانريد منحا نريد استثمارات
📌 وريهم
ه
📰 الحراك السياسي:
👈 السودان يتجاوز عقبة الديون ويحصد دعما دوليا بمؤتمر باريس
📌 ويتجاوز مرحلة الشحدة الى مرحلة الاستثمار
ه
📰 الحراك السياسي:
👈 البرهان/ التحقيقات ستكشف من فض الاعتصام ولاكبير علي القانون
📌 يازول هوي ما تنفخ شديد ، بي وراءك حميدتي كشح الحبر
ه
📰 الحراك السياسي:
👈 وزير الاستثمار للحراك/ صفقات في مجال الطاقة والتعدين ب3 مليارات دولار بمؤتمر باريس
📌 مافي خبر من الدقيق ؟
ه
📰 الحراك السياسي:
👈 رسو 13 باخرة محملة بالوقود في ميناء بورتسودان
📌 عقبال 13 باخرة دقيق كمان
ه
📰 الحراك السياسي:
👈 الشيوعي يحمل المكون العسكري المسؤولية في أحداث ذكري فض الاعتصام
📌 موش خلاص طلعوا لكم كم جندي قالوا ديل هم القتلة ؟
ه
📰 النيل الدولية:
👈 التزامات دولية بمعالجة ديون السودان.
📌 والتزامات زواحفية لخذلان البلد
ه
📰 النيل الدولية:
👈 إعفاء مديونية السودان للبنك وصندوق النقد الدوليين وبنك التنمية الأفريقي.
📌 كنا مدفونين ديون الله يجازي من كان السبب
ه
📰 النيل الدولية:
👈 البرهان وحمدوك يؤكدان العمل بتناغم وإنسجام لإنجاح الفترة الإنتقالية.
📌 واقفين قنا ؟
ه
📰 النيل الدولية:
👈 البرهان: تطبيع العلاقات مع إسرائيل ليست له علاقة بإقامة الدولة الفلسطينية .
📌 حتى لو ليه علاقة تبقى اقامة دولتنا عندنا أهم من إقامة دولتهم
ه
📰 النيل الدولية:
👈 ماكرون يعلن الغاء ديون فرنسا على السودان.
📌 ماقصر معانا والله
ه
📰 النيل الدولية:
👈 مجلس السيادة يقبل استقالة النائب العام ويعفي رئيسة القضاء.
📌 يعني بالعربي كدا مجلس السيادة يكشح الحبر ويكسر المحبرة
ه
📰 النيل الدولية:
👈 انهيار سعر الدولار وشلل تام يضرب سوق العملات بالسودان.
📌 ود ام زقدة
ه
📰 سما نيوز:
👈 البرهان: إلغاء ديون فرنسا على السودان سيفتح الطريق أمام بقية الدائنين والداعمين للسودان.
📌 يعني قصدك يديهم تفويض؟
ه
📰 سما نيوز:
👈 الاتحاد الافريقي يؤكد وقوفه مع شطب ديون السودان.
📌 شكرا أهلنا وعشيرتنا
ه
📰 سما نيوز:
👈 ابوالغيط يعلن عن دعم الجامعة للسودان وحشد المزيد من الدعم.
📌 البغلة التابعة الخيل دي الجابها شنو؟
ه
📰 سما نيوز:
👈 إعادة خدمات التأمين الصحي للأطفال دون سن الخامسه بشمال كردفان.
📌 هو التأمين عنده شنو غير الأدول شراب ومعدوم
ه
📰 أخبار اليوم:
👈 (أخبار اليوم) تورد وقائع مؤتمر باريس لدعم الديمقراطية في السودان.
📌 بختكم … لقيتوا شغل
ه
📰 أخبار اليوم:
👈 النرويج تلغي جميع ديونها على السودان.
📌 هسع النرويج دي الكيزان خبروها واتدينوا منها كيف ؟
ه
📰 السودانيٰ:
👈 لقاء يجمع بين ماكرون والبرهان وحمدوك.
📌 يمكن لمن شاء أن يقارنه بلقاءات المخلوع في أبوجا وجوهانسبيرج
ه
📰 السودانيٰ:
👈 ماكرون: تفخر فرنسا بأن السودان هنا يقدم نفسه اليوم كنموذج لأفريقيا والعالم.
📌 بعد أن كان يقدم نفسه كمرتزقه يحارب بالايجار والا يشحد روسيا عشان تحميه من امريكا

📰 السودانيٰ:
👈 السعودية تقدم 20 مليون دولار لتغطية جزء من الفجوة التمويلية للسودان.
📌 ادونا ليها في ظرف زي بتاع المخلوع داك
ه
📰 السودانيٰ:
👈 “اليونسكو” تُجدِّد دعمها لحرية الإعلام في السودان.
📌 لعناية تلفزيون لقمان
ه
📰 السودانيٰ:
👈 منحة للسودان بـ 2 مليار دولار من البنك الدولي
📌 يا إخواننا بالطريقة دي في ناس بي يجيهم اسهال
ه
ه
📌ابووضاح 📌
https://www.facebook.com/dababies




مصدر الخبر موقع صحيفة الوطن الإلكترونية

اترك تعليق

%d مدونون معجبون بهذه: