صبري العيكورة يكتب: قرب إعفاء الولاة … قطر عجيب


بقلم/ صبري محمد علي (العيكورة)
بعد خمسة شهور وزيادة والحكومة تشير لنا باصابع يدها اليمني المقبوضة ان اصبروا شويه فسيتم اعفاء جميع الولاة فى الاول من أغسطس القادم وسيعين الولاة الجدد فى الخامس منه وسيعلن عن قائمة المجلس التشريعي فى الخامس عشر من ذات الشهر على ان يعقد اول اجتماع له فى الثامن عشر (ياااااا) واخير سيكون لنا ولاة جدد ومجلس تشريعي معين بنسبة ١٠٠% (ايه الحلاوة دي) بعد سبعة اشهر او زيادة من تشكيل حكومة رمسيس الثاني اخير بدأت الحكومة متثاقلة تجمع اطرافها كي تحدثنا وهى تغلق فاها بظاهر كفها متثائبة خلاس يا جماعة حا نعلن عن المجلس التشريعي ونعفى كل الولاة ! ياخى قطر عجيب يودي ما يجيب مع السلامة لايمن نمر وبت الفكي وخالد تبش ! الف سلامة لوالى كسلا الذى لم يري كسلا مع الف سلامة لوالى جزيرتنا الحلوة وهو يتخطى شوارع مدني مشمراً عن ساقية تركها اسوأ مما وجدها . مع الف سلام للناشطين والناشطات من اهل الحظوة وحملة الشنط ورفقاء الولاة مع الف سلامة لاصحاب النثريات الدولارية وحملة الطبل والطار وموسعي الطريق مع الف سلامة لولاتنا العسل نعم سنفرح بذهابكم كما يفرح اهل البيت بمغادرة الضيف الثقيل . اشبعتمونا شعراً ونثراً كما ابدعتم فى بذل الوعود الرخيصة . مع الف سلامة وقد تضاعف عدد المرضي يقتسمون السرير الواحد مع السلامة وقد عز البندول والشاش فى عهدكم الزاهر . مع السلامة ولم تفتتحوا مشروعاً واحداً بولاياتكم مع السلامة وانتم تحيلون ركام الوطن الى حطام بائس . لست متفائلاً بالبديل ولكن حتما سنجد فى (صحن السَلَطه) ما قد تألفه نفوسنا ومهما يكون فلن يكونوا بأسوأ منكم لماذا؟ لانهم قطعاً ليسُ يساراً كلهم وسنجد بينهم من يتوضأ لصلاة العصر داخل مكتبه
ولكن لماذا كل هذه (الجرجرة) ومن يقف خلف كل هذه السلحفائية من مكون (قحت) فحتماً ليس هم الكيزان ولا المؤتمر الشعبي ولا الاصلاح الان . إذا هى (قحت) وليس سواها من تمارس هذا التسويف لتمر مياه قذرة تحت الجسر . تاسيس الشركة الحكومية القابضة لاستثمار الاموال المسترده . التمكين الممنهج لكوادرها داخل مفاصل الدولة . تعيين المجالس الاستشارية للوزراء والفقرة (٨) دال ان يكون بينهم خبراء اجانب !! كلها مياه نتنه مرت من تحت جسر الوطن تسعي نحو (عورقة) السودان . السؤال المطروح كم سننتظر حتى يتم الاعلان عن قضاة المحكمة الدستورية ؟ سبعة اشهر اخري ؟ وزارة العدل والتربية والتعليم والشؤون الدينية (ممنوع الاقتراب والتصوير) الشيخ (فولكر بيرتس) وحده هو يصحح الكراسات و صاحب التوقيع الاخير على جثة وطن ينهب بأيدي بعضاً من العملاء . فالله المستعان

قبل ما أنسي : ـــ
اتمنى عندما يتم اعلان الولاة الجدد ان يعلن اسم الحزب الذى ينحدر منه الوالي . ماعشان الناس تعرف برضو (موجة الراجل) وكده ونقدر نتفاهم معاهو ونشوف مقاس التلج المناسب . وفى جماعة كده من ناس صينة العشاء لا احزاب لا يحزنون لازم نعرفهم . وطبعاً الوالى ده ما عاوز ليهو كفاءة ولا حاجة اى زول برص كلمتين مع بعض ممكن يبقى والى . واى واحده تجيد لفح التوب وكلمتين كدة بالانجليزي ما خلاس ياخ دايرين شنو حسن من كده يللا اعلنوهم بس وريحونا من وجع القلب ده . (ويا يوم واحد ما تسرع تخفف لى نار وجدي)

يا حليهم ياخ ناس عسل واحد قبل موسم الخريف الفات قال لناس ولايتو اى زول عارف ليهو حفرة فى الطريق يبلغ عنها ! أي والله قال كده يعنى أي زول شايف ليهو حفرة لافه يتصل عليهم

و واحد تاني عامل فيها شاعر خاطب ملتقي الصمغ العربي بقصيدة عصماء بها كل ضروب البلاهة الا الصمغ العربي قال فيها مخاطباً حمدوك باخي الرئيس المجد لى والمجد لك وفيها حاجة كده و(كرررج اسنان الفحولة وما برك) اى والله هذ شعر لاحد الولاة . غايتو يا ناس الدراما راجيكم مواهب خارقة فتلقفوها .

اضغط هنا للانضمام لمجموعات الانتباهة على تطبيق واتساب



مصدر الخبر موقع الانتباهه

اترك تعليق

%d مدونون معجبون بهذه: