مُش قلت ليكم؟ – الانتباهة أون لاين


بقلم/ صبري محمد علي (العيكورة)
بالامس نشرت صحيفة [متاريس] خبر أهم ما فيه الصورة الجماعية (الماخمج) للفريق البرهان ورئيس حزب الامة اللواء (م) فضل الله ناصر برمة والمهندس الدقير وآخرين لم اتبينهم بسبب (الكمامات) . جاء فى عنوان الخبر الاتي (وفد من تحالف وحدة الحرية والتغيير يبحث مع البرهان قيام الانتخابات) ! نعم قالوا ناقشوا الانتخابات طيب تعالوا نشوف النقاش ده كيفن . برمة قال بعد اللقاء ان الاجتماع تطرق لمعاش الناس والانتخابات التى تمكن الشعب من اختيار من يحكمه وتناول اللقاء ايضاً (الوضع الراهن فى البلاد) حيث توصل الى (رؤية مشتركة حول وحدة الصف السوداني و تحقيق الاجماع الوطني) ! انتهي الخبر
طيب الجديد شنو هنا ؟ مُش ده الكلام البقولوه كل مره يخرب بيت الاجماع الوطني ياخ ؟ لا لا استني عزيزي القارئ ما تقوم نفسك ساكت . نعم فى جديد ياخي الجماعة عاوزين يشغلوا ويوهموا الرأي العام ان هناك انتخابات جاية ! واصبروا علينا شوية نعم ذات الانتخابات التي قال عنها احد أعضاء مركزية (قحت) ان (الكلام عنها تخرصات) ! انا غايتو فهمت من كلامه ده (تشموها قدحة) .
بعدين هذا الوفد جاء تحت مسمي (تحالف وحدة) الحرية والتغيير ومعروف يا جماعة هنالك من هم خارج هذا التحالف من القحاتة (ذات نفسهم) . إذاً لزوم الخمخمة شنو البعمل فيها فضل الله ناصر والدقير وهما يدركان سلفاً انها زيارة كالمنبته لا ارض قطعت ولا ظهر ابقي . وكلا الرجلين اخذ حزبه الفيها النصيب وعمل نايم . ممكن نقول حزب الامة لربما يراهن على (شوية) العضوية التى ربما تبقت له ولكن على ماذا يراهن الدقير ؟ على (حمي النفاس الثوري؟) ام على وزير صناعة ينعي صناعة السكر ام جاء مراهناً على قطاع الشباب المعجب (بسفة) سلك ؟ .
فيا جماعة ما تخمونا ساكت معاش الناس بتاع شنو البناقشو فضل الله برمة ناصر ياخي انتو خليتو فيها قرش يا سيدي (ابوس ايدك) خلي (المنصورة) ترحمنا شوية من سفراتها المرهقة بعدين الرغيف بجي قال معاش الناس قال !
طيب التوافق الوطني ده تبحثوه مع البرهان ام على ارض الواقع اروني مبادرة واااحدة قادها حزب الامة لوقف نزيف الدماء بدارفور او بالشرق ! وهل من مبادرة مجتمعية منذ فيضان العام قبل الماضي سوي ما عرف حينها (بقدح الاميرة) و هل عالج حزب فضل الله ناصر ملف (الانقاذ) الذى يقض الطرف عنه كلما ذكر (المتكوزنون) آآي مش عبد الرحمن الصادق كان مساعد للبشير واكل معاه فى صحن واحد؟ أها الكلام ده ما سيأتي خصماً على الحزب يا جماعة ويلزمه ان يجدوا مخارجه من هذه المشاركة (المعيبة) قبيل الانتخابات .
أعتقد ناس (غسل لي يدي) العشاء جابوه ديل حقوا ما يتكلموا عن معاش الناس لانهم آخر من يحس باوجاع الناس ولم تستقر لهم مبادئ على مر تاريخهم الطويل (الصحوة الاسلامية) برنامج رفعه الامام الراحل منذ الثمانينيات أين هو ؟ اصبح تطبيع ومطالبة بتسليم البشير للجنائية ؟ وسفرات خارجية و زعرودة داخل البلاط المصري . ملف واحد (لافه) بيهو الوزيرة مريم منذ عام كامل (سد النهضة) والنتيجة ( بق زيرو) .
قبل ما انسي : ــــ

لو لم تعلنوا عن تشكيل مفوضية الانتخابات و نمسكا فى شعبة ايدنا دي مافى زول يكلمنا عن الانتخابات (فاهمين) ؟

اضغط هنا للانضمام لمجموعات الانتباهة على تطبيق واتساب



مصدر الخبر موقع الانتباهه

اترك تعليق

%d مدونون معجبون بهذه: