بابكر سلك يكتب: كنا وين وبقينا وين


*أمس كان يوم مشهود في مسيرة المريخ.
*أولاً لأنو يوم بضع الحد للجدل البيزنطي حول من هو الصاح .
*معروف أن للمريخ مجلسين.
*مجلس ينطح مجلس.
*وجمعيتين.
*جمعية تسخر من جمعية.
*وجمهورين.
*جمهور مع ديل وجمهور مع عديل.
*لذا كان لابد من يوم الفصل.
*أيها الناس.
*كنا وين وبقينا وين.
*عشرات السنين ونصاب جمعيتنا العمومية لا يزيد على عدد أهل عريس ماشين يخطبوا لولدهم.
*وكمان كانت بتتم مرات من الحوش.
*أمس بي جاي تلاتة الف إلا .
*وبهناك الف وتلتمية وكسر .
*الحمد لله الذي هدى المريخاب نحو إكتساب العضوية.
*لو البي جاي محشودة .
*البهناك كانت أضعاف أضعاف ماشهدناه في الجمعيات في الماضي.
*ولو البي جاي صحيحة .
*مرحي للمريخ بجمعية قوامها تلاتة الف ونيف(ضربة بداية).
*كنا وين وبقينا وين.
*المترشحون للجمعيتين عددهم حوالي ستين.
*ياخ عدد المرشحين بس قرب يحصل نصاب الجمعيات العموميات سابقاً.
*وده كلو مكسب.
*صراع مرير .
*ولكنه أقنع القواعد بضرورة نيل العضوية.
*فقديماً كنا لا نأبه.
*طالما الشيخ يفكر لي لماذا أتعب نفسي وأفكر.
*الآن وبفضل الله أقتنعنا بأننا لازم نفكر بأنفسنا لأنفسنا.
*ويفكر الشيخ لنفسه لاينوب عنا في التفكير لأنفسنا.
*الحتة دي عندي أعظم من نيل الممتاز توالياً تلاتة مرات وأجمل من الوصول لمربع العرب الذهبي.
*الحمد لله.
*كنا وين وبقينا وين.
*أيها الناس.
*يسيطر سؤال على أذهان الناس؟.
*الصاح ياتو جمعية؟.
*والإتحاد دورو شنو ودخلو شنو.
*وقد يصل البعض لدرجة القول.
*دي مصيبة شنو الوقعنا فيها دي.
*أنا أفتكر أنو الإتحاد في فتيل.
*فإن كانت الإجراءات التي قامت بها اللجنة الثلاثية صحيحة.
*كان الإتحاد يكون واضح ويوضح موقفو من بدري.
*والظاهر أن مشكلة مجلسين في المريخ دي .
*ولدت قسمين داخل الإتحاد ذاتو .
*قسم يرى أحقية اللجنة الثلاثية.
*وقسم يرى أن ذلك مضيعة وكت بس.
*والحتة دي مادخل المريخ فيها إلا مواقف الإتحاد غيرالواضحة.
*على العموم لحظة الفصل وفرز الكيمان جات.
*يا أما الإتحاد يكون عندو سلطة رفض جمعية والإعتراف بالأخرى بمخرجاتها.
*ويستند على ذلك بمواد نظامه الأساسي.
*يا إما الإتحاد يعتبر مايدور بالمريخ هو فشل في السيطرة على النادي وتسيير دولاب العمل.
*وبالتالي يعلن إنهاء أمد المجلس.
*رفض الجمعيتين.
*تعيين لجنة تطبيع برئاسة مولانا مجذوب.
*طبعاً ده بعد الإشارة للمادة التي يستند عليها الإتحاد في ذلك ويستمد منها تلك السلطة.
*لكن الثابت.
*المريخ طلع من الفتيل.
*والإتحاد دخل الفتيل.
*والحمد لله.
*كنا وين وبقينا وين.
*كنا جوة الفتيل ومرقنا من الفتيل.
*أيها الناس.
*إن تنصروا الله ينصركم.
*أها .
*نجي لي شمارات والي الخرتوم.
*والينا.
*باقي ليك فضل شي فينا!.
*كملنا يا والينا .
سلك كهربا
ننساك كيف والكلب لما شاف عدد حضور الجمعيتين قال إنتوا وكت قدر كده من زمان مالكم .
وإلى لقاء .
سلك

اضغط هنا للانضمام لمجموعات الانتباهة على تطبيق واتساب



مصدر الخبر موقع الانتباهه

اترك تعليق

%d مدونون معجبون بهذه: